MANILA, Philippines - Pinaslang ng isa sa kanyang bisita ang isang 41-anyos na lalaki nang barilin sa gitna ng kanilang inuman kung saan nagdiriwang ng kaarawan ang anak ng biktima kamakalawa ng gabi sa Navotas City.
Agad na nasawi sanhi ng tama ng bala sa ulo at dibdib ang biktimang si Elizer Orozeo, ng Chongkang st., Tanza, ng naturang lungsod.
Nadakip ng mga rumespondeng pulis ang suspek na si Billy De Guzman, 35, at kalugar ng biktima.
Inulat ng pulisya na naganap ang barilan dakong alas-11:40 ng gabi sa tapat ng bahay ng biktima sa Chongkang St.
Nauna rito, kinumbida ng biktima ang suspek sa isang inuman dahil kaarawan ng kanyang anak na panganay. Nang magkalasingan ay naglabas ng baril si De Guzman at nagpaputok sa ere na sinaway ng biktima.
Dahil dito, inihatid ng biktima ang suspek upang umuwi na lamang dahil sa lasing na subalit napikon ang suspek at walang salitang pinutukan si Orozeo. (Danilo Garcia)