MANILA, Philippines - Binaril at napatay ng dalawang hindi nakikilalang lalaking lulan ng motorsiklo ang isang alahero at saka tinangay ang hindi pa mabatid na halaga ng pera at alahas nito kamakalawa ng hapon sa Sta. Cruz, Maynila.
Hindi na umabot ng buhay sa Metropolitan Hospital sanhi ng tama ng bala ng baril sa katawan ang biktimang si Crisanto Cay, 36, ng Molave St., Tondo ng nasabing lungsod.
Patuloy namang inaalam ng pulisya ang pagkakakilanlan sa mga suspek na magkaangkas sa isang scooter na kapwa armado ng baril na mabilis na tumakas matapos ang pamamaril.
Base sa ulat, dakong alas-5:00 ng hapon ng naganap ang insidente sa harapan ng D’Sisters Bigasan Store sa 1472 Alvarez St., Sta. Cruz, Manila.
Pauwi na ang biktima sakay ng kanyang scooter, na Dink 150 (OO 6003) subalit pagsapit sa nasabing lugar ay bigla siyang hinarang ng mga suspek at walang sabi-sabing pinaulanan ng bala sa katawan.
Nang bumagsak ang biktima, kaagad kinuha ng mga suspek ang cash, alahas at personal na baril ng biktima na Taurus cal. 45 pistol saka tumakas gamit ang kanilang motorsiklo. (Gemma Amargo-Garcia)