MANILA, Philippines - Hinihinalang dulot ng malaking problema tulad ng nakaambang matanggal sa trabaho kaya naisipang magpakamatay ng isang 53 anyos na delivery man ng isang restaurant, sa Tondo, Maynila kamakalawa ng hapon.
Tama ng bala sa sentido ang tumapos sa buhay ng biktimang si Rodolfo Delos Santos, may-asawa, pedicab driver/delivery man ng D.Salas Karinderia at residente ng Katamanan St., Tondo.
Naganap ang insidente sa loob ng D. Salas Karinderia sa panulukan ng Yuseco at Dagupan Streets sa Tondo.
Sinabi ng kasamahan sa trabaho ng biktima na si Ryan Cruz nasa loob sila ng pinapasukang restaurant nang magtungo sa isa pang silid ang biktima habang siya umano ay nasa kusina. Maya-maya lamang ay tinawag umano ng biktima ang kaniyang pangalan at nagpaalam sa pagpapakamatay.
“Ryan, magpapakamatay ako. Yun ang narinig ko,” ani Cruz kaya agad niyang pinuntahan ito nang makarinig ng putok ng baril at nadatnan na nakalugmok na umano ang biktima sa semento hawak ang di nabatid na kalibre ng baril.
Bukod sa narekober nabaril, may suicide note umano na nakuha sa kaniyang pitaka na naglalahad ng kaniyang mga problema kaya naisipang magpatiwakal.
Malaking problema umano kung paano bubuhayin ang kanyang pamilya dahil tatanggalin umano sa trabaho ang biktima, ayon sa mga kapitbahay, kaya madalas na balisa ito. (Ludy Bermudo)