MANILA, Philippines - Black eye at mga pasa sa katawan ang natamo ng isang misis matapos na pagbubugbugin ng kanyang mister na naburyong nang hingan niya ito ng pambili ng gatas ng kanilang anak habang lango sa alak sa Barangay Obrero sa Quezon City kahapon ng madaling-araw.
Ang biktima ay kinilalang si Josephine Rivera, 37, residente sa Rolling Road, Obrero.
Personal na nagtungo si Rivera sa Station 10 ng Quezon City Police District para ireklamo ang asawa niyang si Elmer Abalon, 25.
Sinabi ni Josephine na hiningan niya si Elmer ng pambili ng gatas ng kanilang anak pagkauwi nito sa kanilang bahay.
Ngunit, dahil lasing at walang maibigay, nagalit ang suspek lalo na nang sabihan siya ng asawa na “pambili ng alak meron ka, pero pambili ng gatas wala ka,” sanhi upang maburyong ito at bugbugin ang huli.
Sa presinto, nagharap ang mag-asawa at makalipas ang isang oras at dahil araw ng mga ama ng tahanan ay nagpasya ang ginang na patawarin ito ngunit sa puntong hindi na sila magsasama pa sa iisang bubong.
“Ang pasya ng ginang, sustentuhan na lang ng lalaki ang kanilang anak, dahil mas magastos ang magsampa ng kaso,” ayon pa sa pulisya. (Ricky Tulipat)