MANILA, Philippines - Tatlong motorsiklo ang iniulat na tinangay ng hinihinalang mga karnaper sa loob lamang ng may limang oras sa magkakahiwalay na insidente sa lungsod ng Maynila. Nabatid na dumulog sa MPD-Anti-Carnapping and Anti-Hi-Jacking Unit (ANCAR-ANJAR) ang mga biktimang sina Jason Morales ng Osorio St., Tondo; Mary Ann Castelo ng Safari St., Bldg 10 San Andres, Manila at Rigor Benjamin ng Santo Domingo, Brgy. Manresa, St., Quezon City. Sa ulat ng pulisya, dakong 8:00 ng gabi kamakalawa nang iparada ni Morales ang kanyang kulay puting motorsiklo, Yamaha MIO (ZR 1111) sa kanto ng Recto at Legarda St. , Sampaloc subalit nang pagbalik nito hindi na niya nadatnan ang motorsiklo. Sa kasabay na pangyayari, dakong 8:00 din ng gabi kamakalawa nang iparada ni Castelo malapit sa isang tindahan sa San Andres at Osmena Highway , Malate, Maynila ang kulay puting Yamaha MIO (9372 DJ). Dakong alas-12:30 ng madaling-araw naman nang matangay din ang kulay puting motorsiklo, YAMAHA MIO (9956 PL) ni Benjamin sa kanto ng Tolentino at Dimasalang Sts., Sampaloc, Maynila. Nakaalarma na sa awtoridad ang mga nasabing motorsiklo upang masakote ang sinumang may dala nito. (Ludy Bermudo)