MANILA, Philippines – Tuluy-tuloy na ang pagpapalayas sa tatlong malalaking kompanya ng langis sa Maynila. Ito ay matapos na tuluyang ibasura ng Korte Suprema ang ikalawang motion for reconsideration (MR) ng Chevron Phils., Inc, Petron Corporation at Pilipinas Shell Petroleum Corp.
Dahil dito pinagbawalan na rin ng Mataas na Hukuman ang Big 3 na magsumite ng kanilang mga pleadings kaugnay sa kaso base sa nakasaad sa Section 2, Rule 52 ng Rules of Court. Base sa 4 na pahinang resolusyon ng Korte Suprema, naipasa na nila ang basic issues sa kanilang Feb.13, 2008 resolution na nagsasabi na ang argumento ng tatlong kompanya ng langis ay pawang paulit-ulit lamang maging sa kanilang inihahaing apela.
Iginiit din ng Korte na nagsisimula nang sumunod ang Big 3 sa kanilang kautusan na nagpapatalsik sa oil depot sa Maynila matapos silang magsumite ng required plans sa Manila Regional Trial Court (RTC).
Nakasaad sa February 2008 resolution, binasura ng Korte Suprema ang apela na inihan ng Big 3 at nag uutos sa lokal na pamahalaan ng Maynila na kaagad ipatupad ang Ordinance No. 8027 na nag-reclassified sa bahagi ng Distrito ng Pandacan at Sta. Ana mula industrial patungo sa commercial matapos na lumabas sa pagsusuri na ang nasabing lugar ay vulnerable sa pag-atake ng terorista.
Inihalimbawa pa ng Korte ang nangyaring insidente noong January 23, 2008 kung saan ang isang depektibong tanke na naglalaman ng 2,000 liter ng gasolina at 14,000 litro ng diesel ay sumabog sa gitna ng kalsada ilang metro lang ang layo mula sa gate ng Pandacan Terminals na maaring magdulot ng kamatayan, damage at pagkatakot sa mga residente dito.
Inatasan din ng Korte Suprema ang Presiding Judge ng Manila Regional Trial Court (RTC) Branch 39 na istriktong ipatupad ang resolution. (Gemma Amargo-Garcia)