MANILA, Philippines - Isang 34-anyos na ginang ang pinagsasaksak ng isang holdaper nang manlaban siya rito sa Main Road, Bagong Silang, Caloocan City kahapon ng madaling-araw.
Nasa malubhang kalagayan pa sa East Avenue Medical Center habang isinusulat ito ang biktimang si Jean Garner, superbisor ng isang pabrika ng siopao at residente rin sa Bagong Silang.
Sinasabing naglalakad sa nasabing lugar ang biktima papauwi nang lapitan siya ng hindi nakikilalang suspek at akbayan sabay deklara ng holdap habang nakatutok ang patalim sa leeg nito.
Nang kukunin ng suspek ang gamit ng biktima ay pumalag ang huli sanhi upang mapilitang saksakin ng una bago mabilis na tumakas. (Ricky Tulipat)