MANILA, Philippines – Pisak ang ulo ng isang 33-anyos na lalaki nang madaanan ng gulong habang natutulog sa ilalim ng nakaparadang truck, sa Tondo, Maynila, kahapon ng umaga.
Dead on the spot ang biktimang si Ferdinand Castro, residente ng Baseco Compound, Tondo.
Arestado naman ang driver na si Rene Villanueva, 37, ng Nemesis trucking at residente ng Baler St, Paco, Maynila.
Sa ulat ng pulisya, dakong alas-11:05 ng umaga nang maganap ang insidente sa panulukan ng Perez at Benites Sts., Tondo.
Nabatid na nakagawian ng mga tambay o residente sa nasabing lugar na matulog sa ilalim ng mga nakaparadang truck at isa si Castro na natulog umano sa ilalim ng truck na may plakang TXA- 682. Sinabi pa na may sampung oras kung iparada ang mga truck sa lugar habang hinihintay ang mga kargamento Nabatid na ang ulo ni Castro ang nakapuwesto sa tapat ng mismong gulong ng truck na hindi umano tiningnan muna ng driver kung may natutulog bago paandarin.
Hindi umano namalayan ng driver na nakasagasa siya dahil nakarating na ang truck na minamaneho nito sa hauling area sa Pier na hindi nito alam na nakasagasa siya.
Nabigla umano ang suspek nang sundan siya doon upang arestuhin. Kasong reckless imprudence resulting in homicide ang isasampa laban sa suspek. (Ludy Bermudo)