MANILA, Philippines - Kritikal ang isang 18-anyos na estudyante ng University of the East (UE) nang pagtulungang saksakin ng mga miyembro ng Tau Gamma Fraternity, kamakalawa ng gabi, sa Quiapo, Maynila.
Nakaratay ngayon sa Mary Chiles Hospital ang biktimang si Daniel Luis Surell, residente ng Catbalogan St., Batasan Hills, Quezon City bunga ng mga tinamong saksak sa katawan.
Pinaghahanap naman ng pulisya ang mga suspect na sina Chester Ferry, estudyante ng Far Eastern University (FEU) , isang alyas Lando at tatlong hindi nakilalang lalaki na pawang miyembro din ng nasabing fraternity.
Ayon sa ulat ni Manila Police District-Station 3, chief, Supt. Romulo Sapitula, dakong alas-6:30 ng gabi ng maganap ang insidente sa harapan ng Metrobank sa kanto ng CM Recto Avenue at San Sebastian St., Quiapo, Maynila.
Nabatid na inabangan ng mga suspect ang biktima at mga kaibigan nito sa paglabas mula sa isang bilyaran at inatake ng mga suntok at saksak bago tumakas sa direksiyon ng Bilibid Viejo St., Quiapo. (Ludy Bermudo)