Malubhang nasugatan ang isang dalaga makaraang manlaban at saksakin ng isang holdaper kahapon ng madaling-araw sa Malabon City.
Ginagamot sa Jose Reyes Memorial Medical Center sanhi ng saksak sa likod si Annaliza Ladrillo, 18, ng Pampano St., Brgy. Longos ng lungsod na ito.
Tumakas naman ang hindi pa nakikilalang suspect na siya ngayong target ng manhunt ng pulisya.
Ayon sa ulat, dakong ala-1:45 ng madaling-araw, naglalakad papauwi ang biktima sa Martiniko St., Longos nang sumulpot ang suspek na armado ng patalim. Kinuha ng suspek ang hand bag ng biktima na naglalaman ng cellphone at mga gamit, subalit nakipag-agawan si Ladrillo.
Dahil dito, sinaksak ng suspek ang biktima bago tumakas dala ang hand bag, habang dinala naman si Ladrillo ng ilang taong naroroon sa pagamutan. (Lordeth Bonilla)