Hinihinalang selos ang ugat ng pamamaril ng isang grupo ng kabataan sa isang 18-anyos na lalaki na hinahatid ang kanyang nobya, kamakalawa ng gabi sa Quezon City.
Nakilala ang nasawi na si Michael Estoye Jr., estudyante, at residente ng Sampaguita Extension, Brgy. Payatas-A, ng naturang lungsod. Hindi na ito umabot ng buhay sa East Avenue Medical Center dahil sa tama ng bala ng sumpak sa katawan.
Arestado naman ng pulisya ang mga kabataang suspek na sina Jester Tan, 19, isang 17-anyos na Tsinoy na itinago sa pangalang Kim at isa pang alyas Joel, 17, pawang mga residente ng Area 3, Veterans Village, Brgy. Bagong Silangan.
Sa ulat ng Quezon City Police District-Homicide Section, dakong alas-9 kamakalawa ng gabi nang maganap ang krimen sa Area 4, Veterans Village ng naturang barangay.
Naglalakad umano si Estoye kasama ang kasintahan nito sa nasabing lugar nang basta na lamang harangin sila ng mga suspek at walang sabi-sabing binaril ng sumpak ang biktima. Agad namang nadakip ng mga rumespondeng kagawad ng barangay at pulisya ang mga suspek bago pa man makatakas ang mga ito. (Danilo Garcia)