Trahedya ang sinapit ng pagsasama ng isang mag-asawa makaraang mabaril at mapatay ng isang sundalo ang kanyang misis dahil sa matinding selos habang kritikal naman ito nang barilin din ang sarili kamakalawa sa Barangay Pinyahan Quezon City.
Nakilala ang nasawi na si Roquisa Rutaquio, 39-anyos, residente ng Brgy. Pinyahan. Nasa “comatose” na kondisyon naman ngayon sa V. Luna General Hospital ang suspek na si Sgt. Larry Rutaquio matapos magtamo ng tama ng bala sa ulo.
Dakong ala-1:30 kamakalawa ng hapon nang maganap ang pamamaril sa kanto ng Matapat street at V. Luna Avenue sa Barangay Pinyahan kung saan nagtitinda ng prutas si Roquisa.
Bigla umanong dumating ang sundalo at kinompronta ang asawa ukol sa isang mensahe na natanggap nito sa cellphone na labis nitong ikinaselos. Dito sumiklab ang pagtatalo sa pagitan ng mag-asawa hanggang sa magbunot ng kanyang kalibre .45 baril ang sundalo at tatlong beses na paputukan ang misis.
Nang makitang duguan ang asawa, dito itinutok ng sundalo ang sariling baril sa ulo at ipinutok ito. Agad namang isinugod ang dalawa sa pagamutan ngunit tuluyang nasawi ang ginang.
Sinabi pa ng mga kapitbahay na ilang araw na umano nilang nakikitang nagtatalo ang dalawa dahil sa hinala ng sundalo na may ibang lalaki ang kanyang misis na itinatanggi naman nito.