Tinambangan at napatay ang isang 42-anyos na maybahay ng isang negosyanteng Indian national ng hindi nakilalang mga suspect habang sakay ng kanyang kotse sa Paco, Maynila, kamakalawa ng gabi.
Patay na nang idating sa pagamutan ang biktimang si Janet Singh, ng Palm Village, Makati City bunga ng tinamong apat na bala ng kalibre .45 baril. Mabilis namang tumakas ang mga suspect lulan ng isang motorsiklo.
Sa ulat ng pulisya, dakong alas-10:00 ng gabi nang ma ganap ang insidente sa panulukan ng United Nations Ave. at Tanque St. sa Paco. Sakay umano sa kulay itim na Honda CRV (ZAK 938) ang biktima nang lapitan ng mga suspect at pinagbabaril ito habang nasa loob ng sasakyan.
Nang makita ng kapatid na si Gerald Tabieros, na noo’y nagbabantay ng mini grocery ay nagtangkang saklolohan ang biktima subalit siya man ay pinaulanan ng putok na masuwerteng hindi naman tinamaan.
Binalikan pa umano ng putok ng mga suspects ang biktima upang tiyaking patay na bago tuluyang tumakas. Patuloy pa rin ang isinasagawang imbestigasyon sa kaso. (Ludy Bermudo)