Patay ang isang 52-anyos na lalaki makaraang masaksak ito ng nakababatang kapatid na babae matapos na magtalo hinggil sa problemang pampamilya kamakalawa ng gabi sa Marikina City.
Kinilala ang biktima na si David Agcaoili, binata, na agarang nasawi matapos na masaksak sa dibdib ng kanyang nakababatang kapatid na si Carolina Agcaoili, 48, kapwa residente ng Panorama St. Brgy. Concepcion Dos ng nasabing lungsod.
Ayon kay Supt. Sotero Ramos, hepe ng Marikina police, naganap ang insidente dakong alas-9 ng gabi sa loob ng bahay ng pamilya Agcaoili nang magtalo hinggil sa problemang pampamilya ang magkapatid.
Nauwi ang pagtatalo sa awayang pisikal hanggang makakuha umano ng patalim ang suspek at saksakin sa dibdib ang kanyang kuya. Matapos ang insidente ay tumakas ang suspek subalit makalipas ang ilang oras ay sumuko din ito sa pulisya.
Kasalukuyang nakapiit sa Marikina cell ang suspek habang inihahanda ang kasong isasampa laban dito. (Edwin Balasa)