Tuluyan nang nakapiling ng isang walong taong gulang na batang Hapones ang kanyang ama mula sa Japan matapos na kupkupin ng Manila Department of Social Welfare noong nakaraang taon.
Oktubre 2 nang personal na makita ni Hikaru Ito ang kanyang ama na si Hajime sa Foundling Home, isa sa mga institusyon ng Boys Town sa Marikina City matapos ang mahabang panahon ng paghahanap dito sa Pilipinas. Mismong si Hajime ang sumundo kay Hikaru.
Ayon sa pahayag ni MDSW chief Jay dela Fuente, Mayo 4, 2007 nang una nilang sagipin si Hikaru sa Quiapo. Nakita nila itong pagala-gala hanggang sa kunin ng kanyang ina na si Melinda Ito.
Pebrero 8, 2008 nang makipag-ugnayan ang Manila City Hall sa Japanese Embassy upang kumpirmahin ang pagkatao ng bata. Naging mabilis naman ang tugon ng embahada ng Japan kung kaya nakumpirma ang pagkatao nito. (Doris Franche)