6 'kotong' money changer, timbog

Sinalakay at pinagda­dampot ng mga tauhan ng District Mobile Force Unit (DMPU) ng MPD ang anim kataong pina­niniwa­laang responsable sa mga ‘pangongotong’ o kulang ang ibinabayad sa mga nagpapalit ng dol­yar sa ilang money changer, sa Ermita, May­nila, kahapon ng hapon.

Kinilala ang mga na­dakip na suspects na sina Billy Akmad, 54; dalawang anak nitong sina Odan, 22, at Randy, 23; Lauro San­tiago, 18, Joseph Gomez, 23; at Rogie Unay, 22.

Ayon sa report, da­kong alas-12 ng hapon nang isagawa ang ope­rasyon sa iba’t ibang money changer sa Ma­bini St., at Sta. Monica St., Ermita, Manila.

Nabatid na ipinarating sa pamamagitan ng e-mail kay MPD Director Roberto Rosales ng mga nagre­reklamong biktima ang sina­sabing ‘kotong’ na money changer noong Agosto 17, 2008.

Isa sa biktima ay naki­lalang si Jasmin Cruz-Van Schaik, asawa ng isang Dutch national, na nagpalit ng dolyar noong Agosto 7, 2008 sa Len Money Changer sa A. Mabini St., Malate, at na­tangayan siya ng P180,000 na dito na­aresto ang isang teller na nagngangalang Anna­belle Santos, 38.

Bukod sa e-mail, ilang overseas Filipino workers din ang lumantad sa tang­gapan ng MPD na uma­no’y nakaranas din ng short changed kaya ipinag-utos ni Rosales ang pagsa­sagawa ng operasyon.

Kaugnay nito, nabatid na ilang pulis-Maynila ang kinakaibigan ang umanoy nagbibigay pro­teksyon sa mga tiwaling money changer na naki­kinabang din sa ilegal na operas­yon ng mga ito. (Ludy Bermudo)