Katulong na lumason sa mga amo, arestado

Nagtagumpay ang Manila Police District (MPD) sa gi­nawang pagtugis sa isang ka­tulong na miyembro ng sindi­katong nilalason muna ang mga among Tsinoy at kapwa ka­sambahay bago isasagawa ang pagnanakaw nang ma­lam­bat ito sa bahagi ng Que­zon City, kahapon ng umaga.

Kasalukuyang nakapiit ngayon sa MPD-Station 11  ang suspect na si Annamie Librando, 30, dalaga, tubong- Cebu at residente ng F. Duhat St., Project 7, Quezon City

Sa ulat ni P/Supt. Nelson Yabut, dakong alas-10 ng umaga nang madakip ang suspect sa loob ng isang ka­rinderya sa lungsod Quezon.

Positibo naman itong iti­nuro ng kanyang mga naging biktima. Nabatid na matagal  nang pinaghahanap ang na­sabing katulong matapos ang serye ng pagnanakaw nito ng mga alahas at salapi sa mga pinasukang amo parti­kular ang mga mayayamang Tsinoy sa Binondo at Sta. Cruz, Maynila.

Ang modus operandi umano ng suspect ay kinaka­ibigan ang mga guwardiya at kinukumbinse ang mga ito na ipasok siya bilang katulong. Sa oras na siya ay matang­gap, magpapakita ito ng ka­ba­itan upang kagiliwan ka­agad at saka isasagawa ang maitim na balak.

May bitbit na umano itong dry powder na inihahalo sa pag­­kaing niluto, kape, tubig, juice at iba pa upang matiyak na mala­lason o masisira ang tiyan ng lahat ng mga ka­sama sa bahay. Habang nasa os­pital ang kanyang mga nilason  ay saka naman si­simu­tin umano ang mga alahas at salapi ng amo.

Sa kaso ng ibang biktima, siya pa mismo umano ang nag­dala sa ospital sa amo at habang nakaratay sa paga­mutan ang mga amo, bu­mabalik ito sa bahay ng amo upang magnakaw at tuluyang tumakas.

Sa pag-amin umano ng bik­tima na miyembro siya ng sindikato, inginuso niya  ang isang Rita Manabat Mendoza, isang alahera na ‘utak’ umano ng pagsusuplay ng kemikal na dry powder para ihalo sa pag­kain at inumin ng bibiktimahin.

Ibinunyag pa ng suspect na 10 porsyento lamang umano sa kanilang nakuku­lim­bat ang napupunta sa kanya at ang ibang bahagi ay napupunta sa sindikato.

Kabilang sa nagreklamo sina Vina Sy na natangayan ng P200,000 cash at alahas noong Agosto 5, 2008; isang Benito Tan na nawalan ng mga alahas noong Agosto 19, 2008, at isa pang insidente umano ang Pua family na tina­ngayan ng P45,000 cash at alahas.