Dinakip ng mga tauhan ng Manila Police District-Anti-Carnapping (MPD-ANCAR) ang isang 51-anyos na lalaki at pamangkin nito sa aktong kumakatay ng kinarnap na motorsiklo, sa Sta. Ana, Maynila. Nakilala ang nadakip na mag-tiyo na sina Benjamin Manansala Jr, at pamangkin nitong si Reynaldo Manansala, 21, kapwa residente ng #2064 Batangas Line St., Sta. Ana, Manila. Ito’y matapos na pormal na maghain ng reklamo ang isang Darius Hilario, 37, Project Manager ng 1674 Road 20 Fabie Estate, Paco, Manila. Ayon sa ulat, dakong alas-3:30 ng hapon ng arestuhin ang mga suspek sa harapan ng kanilang bahay habang china-chopchop ang mga piyesa ng mga ninakaw na motorsiklo. Ayon sa biktima ipinarada niya ang pulang Honda Wave 125cc sa kanilang compound nang mawala ito sa pagitan ng alas-8 ng gabi hanggang kinabukasan ng alas-5 ng umaga, Agosto 3, 2008.
Sa tulong ng concerned citizen ay itinuro ang mag-tiyo at nang puntahan ang mga ito ay naaktuhan pa ang dalawa habang binabaklas ang nakaw na motorsiklo na nakatakda na sanang ibenta. (Ludy Bermudo)