Isang 19-anyos na binata na papauwi na sana pero nakisali pa sa nadaanang ‘riot’ ng kanyang mga ka-tropa, ang nabaril at napatay sa San Andres Bukid, Manila kahapon ng madaling-araw.
Hindi na umabot ng buhay sa Ospital ng Maynila ang biktimang si Brian Sanchez, ng #2394 Tenorio St., San Andres Bukid, Maynila bunga ng tinamong bala sa katawan.
Nagsasagawa naman ng follow-up operation ang pulisya at barangay officials sa lugar laban sa tatlong umano’y miyembro ng isang fraternity gang na armado umano ng mga improvised shotgun na siyang sangkot sa naturang krimen.
Sa ulat ng pulisya, dakong alas-3:20 ng madaling-araw nang maganap ang insidente sa tapat ng 1922 TNT Dagonoy St., San Andres Bukid.
Nabatid na papauwi na ang biktima kasama ang isang Jonalyn Balmes matapos dumalo sa isang birthday party nang madaanan ang nagrarambol na dalawang gang.
Nang makita ang mga ka-tropa na nakikipaglaban ng batuhan ay nakihalo ito sa tropa at hindi umano nagtagal ay bigla na lamang itong bumuwal matapos umalingawngaw ang sunud-sunod na putok ng baril. (Ludy Bermudo)