AFP pumalag sa isyu ng kidnap

Foul!

Ito ang naging pag-alma ni AFP-Public Information Office (AFP-PIO ) Chief Lt. Col. Er­nesto Torres Jr. sa umano’y ma­lisyoso at mapanirang paratang ng KARAPATAN na ki­nidnap ng intelligence ope­ratives ng militar ang dala­wang anak ng pinaslang na lider militante.

Sinabi ni Torres na hindi kinidnap ng AFP  na sinasabi ng KARAPATAN ang magka­patid  na sina Roseann Guma­noy, 21, at   Fatima, 17.

Una rito, ibinulgar ni Fr. Dui­nonbito Cabillas, isang Aglipayan Priest at Director ng Karapatan na dinukot umano noong Hulyo 3 ng mga intel­ligence operatives ng AFP ang magkapatid sa Alabang, Muntinlupa City habang pa­tungo ang mga ito sa Cavite.

Ang magkapatid ay   anak ni Eddie Gumanoy na ka­samang pinaslang ni Eden Mar­cellana, Secretary Gene­ral ng KARAPATAN Southern Tagalog sa Bansud, Oriental Mindoro may limang taon na ang nakalilipas.

Ayon kay Torres si Rose­ann ay isa umanong kasapi ng New People’s Army ( NPA) na kinasuhan ng rebelyon ma­tapos itong sugatang ma­aresto ng militar sa isang eng­kuwen­tro sa Gen. Nakar, Que­zon noon pang Abril 15 ng taong ito.

“She (Roseann)  was brought to AFP Medical Center  for treatment.  Even­tually, she was committed to the Quezon Provincial Jail, allowed to post bail and placed under custody of Karapatan,” ani Torres.

Sinabi ni Torres na ma­tapos ito ay kusang-loob uma­nong umalis si Roseann sa kustodya ng KARAPATAN kung saan ay pinaratangan kaagad ng grupo ang AFP operatives na nasa likod ng pagdukot sa naturang biktima.

Idinagdag pa ni Torres na boluntaryong dumulog at hu­mingi ng tulong sa kanila si Roseann na sinamahan pa ng kaniyang kapatid na si Fatima taliwas naman sa alegasyon ng KARAPATAN na kinidnap nila ang dalawa.

“Coordination is being done by the military  with the Quezon court  as regards her legal disposition. She ‘s facing a rebellion charge.  She failed to attend the hearing sche­duled  on July 2. A warrant for her arrest was issued by the court. She was accom­panied by her sister Fatima”, dagdag pa ni Torres. (Joy Cantos)