NBI pasok sa Asdala slay

Magsasagawa na rin ang National Bureau of Investigation (NBI) ng hiwalay na imbesti­gasyon kaugnay sa pagpaslang kay Commission on Election (Comelec) Law Department OIC na si Atty. Wynne Asdala.

Ayon kay NBI Director Nestor Mantaring, ang pagpasok ng NBI sa nasabing kaso ay bun­sod na rin ng kahilingan ni dating Associate Justice at ngayon ay Comelec Chairman Jose Melo.

Sinabi pa ni Mantaring na bubuo ang NBI ng isang fact- finding committee na siyang ma­ngunguna sa nasabing imbes­tigasyon. Aniya, ikinatuwiran ni Melo na mas mapapadali ang pag­resolba sa kaso ng pag­patay sa mga opisyal ng Co­melec kung magkatulong ang NBI at ang pulisya sa pagtugis sa sinumang responsable rito.

Bunsod nito’y agad na pina­kilos ni Mantaring ang mga ta­uhan upang mangalap ng mga ebidensiyang magtuturo sa pag­kakakilanlan ng suspek na bu­ma­ril kay Asdala noong Mar­so 24, 2008 sa Intramuros, Maynila.

Samantala, nakaharap pa rin sa blankong pader ang mga operatiba ng Manila Police Dis­trict-Homicide division kaugnay sa nasabing insidente.

Ayon kay Det. Dave Tuazon, wala pa ring nakukuhang wit­ness ang pulisya matapos na pa­tuloy na isnabin ni Rena Ballo, stenographer ni Asdala at huling kasama nito bago tambangan ang naturang Comelec official.

Aniya, hindi umano mapipilit si Ballo sa desisyon nito na ma­nahimik dahil sa umano’y posib­leng takot nito na siya ang bali­kan ng suspek o utak sa pag­patay kay Asdala.

Sinabi pa ni Tuazon na sa ngayon ay masusi muna nilang sinisiyasat ang anggulong may kaugnayan sa trabaho ang pag­patay sa biktima.

Si Asdala ay tinambangan habang naglalakad sa Soriano Ave., panulukan ng Cabildo st., Intra­muros kung saan ito ay pa­balik na sa kanyang tangga­pan sa Comelec. (Grace dela Cruz)