Tinatayang aabot sa P.1 milyong payroll ang iniulat na nalimas ng mga holdaper mula sa mga kawani ng lending company kahapon ng madaling-araw sa Quezon City.
Sa himpilan ng Quezon City Police District-Station 4 (Novaliches), ipinagbigay-alam ng mga biktimang sina Randy Lastimoso, at security guard na si Aldrin de Leon na kapwa trabahador ng CNN Lending Company, ang naganap na insidente.
Nabatid na binabagtas ng mga biktima ang kahabaan ng Quirino Highway sakay ng Nissan Frontier pick-up nang harangin at holdapin ng mga armadong kalalakihang sakay ng pulang motorsiklo sa bahagi ng Forest Hills Subd. sa Brgy. Gulod, Novaliches.
Nakaamba na sanang paputukan ng shotgun ni de Leon ang isa sa dalawang holdaper subalit nag-jam ang armas nito kaya hindi na niya nagamit.
Hindi na nakapalag pa ang dalawa matapos tutukan ng baril ng mga suspek at tuluyang matangay ang dala nilang pera.
Kasalukuyan namang isinasailalim sa imbestigasyon ang naturang insidente upang mabatid ang pagkakakilanlan ng mga suspek at makatiyak na walang naganap na inside job. (Danilo Garcia)