Isang grade -2 pupil ang nasawi matapos itong mabundol at magulungan ng isang pampasaherong jeep kamakalawa ng gabi sa Caloocan City.
Dead-on-arrival sa Manila Central University (MCU) Hospital ang biktimang si Kimberly Salazar, 6, ng Salmon St., Dagat-Dagatan, ng nabanggit na lungsod. Kasalukuyan naman nakaditine at nahaharap sa kasong reckless imprudence resulting to homicide ang suspek na si Ferdinand Corpuz, 42, ng Brgy. Tugatog, Malabon City.
Ayon sa ulat, naganap ang insidente dakong alas-6 ng gabi sa mismong tapat ng Gomburza Elementary School, paaralan ng biktima, na matatagpuan sa kahabaan ng Samson Road, Caloocan City. Nabatid na papatawid ang biktima mula sa loob ng naturang paaralan para umuwi ng kanilang bahay, hindi nito napansin ang paparating na rumaragasang pampasaherong jeep na minamaneho ni Corpuz.
Huli na bago nakontrol ng suspek ang kanyang preno at nabundol niya ang biktima hanggang sa tumilapon ito ng ilang metro ang layo at minalas pang magulungan ang bata ng naturang sasakyan.
Dali-dali namang isinugod ng naturang driver ang biktima sa nasabing pagamutan subalit hindi ito umabot ng buhay. (Lordeth Bonilla)