Patay ang isang grade 5 pupil makaraang mahagip ito ng ligaw na bala nang mag-riot at magbarilan ang dalawang grupo ng kabataan na pawang mga miyembro ng magkalabang gang, kamakalawa ng hapon sa Taguig City.
Batay sa imbestigasyon, dakong alas-3 ng hapon nang mangyari ang nasabing insidente sa mismong PNP Site, East Service Road, nabanggit na lungsod.
Nabatid na nag-ugat ang pagkakasawi ng biktima na kinilala lamang sa pangalang Baby, mag-aaral sa Tenement Elementary School sa Brgy. Western Bicutan, makaraang mag-riot ang dalawang grupo ng kabataang gang na pawang nagmula sa Sitio Tago-Tago at Sitio Masigasig ng nabanggit na lugar.
Napag-alaman na una umanong nagkaroon ng batuhan sa pagitan ng nasabing dalawang grupo na kalaunan ay nauwi na sa barilan dahilan upang mahagip ng ligaw na bala ang nasabing paslit na noon ay kasalukuyang naglalaro.
Lumalabas naman sa isinagawang imbestigasyon ng Scene of the Crime Operations (SOCO) na nagtamo ng isang tama ng bala sa ulo mula sa hindi pa nababatid na kalibre ng baril ang biktima dahilan upang agad itong masawi. (Rose Tamayo-Tesoro)