Pinagbabaril hanggang sa mapatay ng tatlong hindi pa kilalang mga suspect ang isang negosyante habang ipinapakita nito sa isang kostumer ang kanyang ibinebentang sasakyan kahapon ng umaga sa Maynila.
Dead-on-the-spot ang biktimang si Armando Galicia, 54, may-ari ng Malate Auto Sales at residente ng 1718 Jorge Bocobo St. Malate, Maynila bunga ng tama sa ulo, dibdib at kamay habang agad namang dinala sa ospital ang misis nitong si Irish, 38, na nagtamo ng tama ng bala sa kaliwang balikat.
Batay sa inisyal na imbestigasyon ni PO3 Rommel Bautista ng Manila Police District-Homicide Section, naganap ang insidente dakong alas-11:15 ng umaga sa harap ng nasabing bilihan ng sasakyan sa 2631 Arellano St. Malate, Maynila. Kasalukuyang tinitingnan ng biktima ang isang FX taxi bilang routinary inspection nang biglang dumating ang dalawang motorsiklo.
Isa sa mga naka-motorsiklo ang nagpanggap na bibili ng sasakyan subalit bigla na lamang itong pinaputukan ng isa sa mga suspect ng kalibre .45 baril ang biktima sa ulo.
Dito naman lumabas si Irish na pitong-buwang buntis nang makarinig ng putok, na binaril naman sa kaliwang balikat ng suspect.
Matapos ang pamamaril ay mabilis na tumakas ang mga suspect patungong Makati.
Inaalam pa ng pulisya ang motibo ng pamamaslang bagama’t inaalis na nila ang anggulong robbery dahil wala namang nawalang personal na gamit o pera ang biktima. (Doris Franche)