Nilalapatan ng lunas sa Las Piñas District Hospital ang biktimang si Joven Contreras, nakatira sa #1177 Santol St., Brgy. CAA ng lungsod na ito sanhi ng dalawang tama ng bala buhat sa kalibre .38 baril.
Kaagad namang tumakas ang suspect na si Ronald Evangelista, 25, isang construction worker, taga-Del-Nor Side, Brgy. Talon Uno, Las Piñas City.
Sa imbestigasyon ng pulisya, naganap ang insidente dakong alas-3 ng madaling-araw sa panulukan ng Santol at Avocado Sts., Brgy. CAA, ng naturang siyudad.
Nabatid na may matagal nang atraso ang biktima sa suspect na hindi naman nabanggit ang dahilan.
Inabangan ng suspect ang biktima at nang kanya itong matiyempuhan ay walang sabi-sabing binaril ng ilang ulit.
Mabilis na isinugod ang biktima ng rumespondeng mga tanod sa nabanggit na pagamutan.
Sa ngayon ay patuloy na iniimbestigahan ang nasabing kaso. (Lordeth Bonilla)