Ayon kay Supt. Ericson Velasquez, hepe ng Mandaluyong police, nag-withdraw ng halagang P3 milyon sa isang bangko sa kahabaan ng Shaw Blvd. ang biktimang si Rachel Alberto, 30, driver sa WRC Group of Co. kasama ang isa pang empleyado. Lulan si Alberto sa isang itim na Pajero, habang ang pera na winithdraw ay nasa kabilang sasakyan.
Mistulang back-up vehicle ang Pajerong minamaneho ni Alberto.
Subalit naipit sa trapik ang sinasakyan ni Alberto kaya napahiwalay ito sa kasamang sasakyan.
Hinarang ng tatlong suspect na lulan sa isang motorsiklo ang sasakyan ni Alberto at inakalang ito ang may dala ng pera kung saan agad na pinaulanan ng putok ng baril ang biktima na tinamaan sa kili-kili at hita na naging sanhi ng kanyang kamatayan.
Bumaba ang dalawa sa mga suspect at hinalughog ang loob ng Pajero subalit walang nakitang pera, kung saan mabilis na nagsitakas.
Malaki ang hinala ng pulisya na inside job ang naganap na insidente dahil alam ng mga suspect kung saan at anong oras nag-withdraw ng pera ang dalawang drayber.(Ulat ni Edwin Balasa)