Namatay sa pinangyarihan ng insidente sanhi ng mga tama ng bala ng baril sa katawan ang mga biktimang sina Carlos Montano, 67, retiradong overseas Filipino worker at asawa nitong si Warlita, 57, kapwa ng #29 L. Cruz Compound Sta. Quiteria, ng nasabing lungsod.
Inoobserbahan naman sa Quezon City General Hospital ang anak nilang si Darwin, 26, empleyado ng Channel 7 na nagtamo rin ng tama ng bala ng naturang baril sa katawan.
Arestado naman at nakakulong ang suspect na si Ernesto Taylor Jr., 27, security guard at kapitbahay ng pamilya Montano.
Sa ulat ng pulisya, dakong alas-5:45 ng madaling-araw nang maganap ang insidente sa loob ng bahay ng mga biktima kung saan kasalukuyang nanonood ng pang-umagang telebisyon ang mag-asawang matanda nang bigla silang pasukin ng suspect na armado ng kalibre .38 baril.
Agad na pinaputukan ng suspect ang mag-asawa bago tinungo ang silid ni Darwin na kasalukuyang natutulog sa kanyang silid at ito naman ang pinaputukan ng dalang baril.
Isa pang anak ng mag-asawa na si Charles ang nakarinig ng putok ng baril ang agad na lumabas ng kanilang bahay at nagtungo sa Police Community Precinct 2 ng Caloocan Police upang humingi ng tulong.
Ayon sa mga rumespondeng pulis, inabutan nila ang suspect na kasalukuyang nakatayo sa pintuan ng bahay ng mga Montano at nang makita nito ang mga awtoridad ay tinangka pa nitong tumakas subalit agad ding nasakote at nakuha ang baril na ginamit nito.
Nabatid pa sa mga awtoridad na bago ang insidente ay napatay ng suspect ang isang kapwa security guard sa harap ng Erap City sa Rodriguez, Rizal nang tumanggi ang kanyang kasamahan na ibigay ang service firearm nitong kalibre .38 na siya namang ginamit nitong pamamaril sa pamilya Montano. (Ulat ni Rose Tamayo)