Hindi na umabot nang buhay makaraang isugod sa Tondo Medical Center sanhi ng mga tinamong tama ng bala ng baril sa ulo at katawan si Carmella Cinco-Chua, 44, may-ari ng Consignacion sa Navotas Fish Market at residente ng Limot St., Daang Hari ng nasabing bayan.
Namatay naman habang ginagamot sa UST Hospital ang kapatid nitong si Myra Cinco-Cruz, 46, na tinamaan ng bala ng baril sa batok na tumagos sa mukha nito.
Sa ulat ng pulisya, dakong alas-7:30 ng umaga ng maganap ang insidente sa kahabaan ng F. Pascual, Barangay San Jose, Navotas.
Ayon sa ulat, kagagaling lang ng magkapatid sa kanilang puwesto sa Navotas Fish Port at habang tinatahak ng mga ito ang naturang lugar lulan ng kanilang owner-type jeep na may plakang WFR-150 ay bigla na lamang silang hinarang ng apat na suspect.
Agad umanong tinutukan ng mga suspect ang magkapatid at pilit na kinukuha ang dala nilang bag na naglalaman ng malaking halaga ng salapi at mahahalagang gamit.
Nanlaban umano ang dalawang biktima kaya agad silang pinaulanan ng putok ng baril ng mga suspect.
Mabilis na tumakas ang mga salarin dala ang nakulimbat sa magkapatid na biktima.
Patuloy pa rin ang isinasagawang imbestigasyon sa kaso at ang pagtugis sa mga suspect. (Ulat ni Rose Tamayo)