Tsinoy huli sa 'gun ban'

Isang 57-anyos na Tsinoy ang naaresto kamakalawa sa Quezon City bilang ‘buena mano’ sa inilatag na election gun-ban.

Kinilala ng pulisya ang suspect na si Tyrone Chua ng #420 G. Araneta Ave., Brgy. Imelda, Quezon City.

Base sa ulat, si Chua ay naaresto ng mga nagpapatrulyang pulis dakong alas-11 ng tanghali sa Banawe St., corner Simoun St. sa nabanggit na lungsod.

Naaresto ang suspect matapos na impormahan ng ilang mga residente ng nabanggit na lugar na may isang armadong lalaki ang pagala-gala sa kanilang lugar.

Nakuha sa posesyon ni Chua ang isang .45 caliber pistol at mga bala nito.

Napag-alaman na may mga kaukulang dokumento ng baril ni Chua bagamat wala itong maipakitang clearance mula sa Commission on Elections dahilan upang arestuhin ito at ikulong. (Ulat ni Rose Tamayo)