Killer ng parak,timbog

Matapos ang mahigit isang taong pagtatago ay naaresto na kahapon ang isang 51-anyos na lalaki na pumatay sa isang pulis sa Marikina City.

Ang suspect ay nakilalang si Jack Zacaria, alyas Barambangan Tagub Karim, tubong Lanao del Norte at kasalukuyang nakatira sa Singkamas St., Tumana Concepcion Uno, Marikina City. Ito ay naaresto ng mga miyembro ng Special Weapon and Tactics ng Marikina City Police sa bisa ng warrant of arrest na ipinalabas ni Judge Reuben dela Cruz ng Marikina City RTC Branch 272.

Sa ulat, naaresto ang suspect dakong alas-9:45 ng umaga sa kahabaan ng Singkamas St. nang makatanggap ng tip ang pulisya na nakita itong pagala-gala sa nasabing lugar.

Agad na rumesponde ang mga pulisya at naaresto ang suspect sa loob ng bahay nito. Nakuha rito ang dalawang baril at mga bala nito.

Napag-alamang pinagbabaril hanggang sa mapatay ng suspect ang pulis na si PO3 Rodolfo Samaniego ng Marikina City police habang nagsasagawa ito ng follow-up operation sa Tumana ng nasabing lugar. (Ulat ni Edwin Balasa)