40-anyos na dalaga,inilayo sa nobyo nagpakamatay

Isang 40-anyos na dalaga ang nagpakamatay sa pamamagitan ng pagbibigti matapos umanong ayawan ng kanyang mga magulang ang kanyang nobyo, kamakalawa ng gabi sa lungsod ng Pasig.

Patay na nang matagpuan ng kanyang mga kamag-anak si Jenny Alberto, ng Dr. Sixto Antonio St., Barangay Caniogan ng nasabing lungsod.

Ayon kay SPO2 Rodolfo Salamanca, may hawak ng kaso na dakong alas-7:30 ng gabi nang matagpuan ng kanyang pinsang si Myrna Ramirez na nakabitin sa kuwarto si Jenny gamit ang isang nylon cord na isinabit sa kisame.

Binanggit ni Myrna na yayayain na sana niyang kumain si Jenny nang makita niyang nagbigti ito.

Malaki ang paniwala ng pulisya na labis na dinamdam ni Jenny ang pag-ayaw ng kanyang mga magulang sa kanyang nobyo na dahilan ng paghihiwalay ng dalawa. (Ulat ni Edwin Balasa)