Traffic enforcer sinasagasaan ng hinuling taxi driver

Isang traffic enforcer ng Makati Public Safety Assistance (MAPSA) ang nasa kritikal na kondisyon makaraang sagasaan ng isang taxi driver na nagalit nang hulihin ng una, kahapon ng hapon sa Makati City.

Nasa malubhang kalagayan sa Makati Medical Center ang biktima na nakilalang Juanito Baral.

Samantalang nakapiit naman ang suspect na si Felipe Besama, 54, ng Barangay San Nicolas, DBB, Dasmariñas, Cavite.

Sa isinagawang imbestigasyon, naganap ang insidente dakong ala-1:30 ng hapon sa panulukan ng Jupiter St. at Makati Avenue ng lungsod na ito.

Ang biktima ay nakatalagang traffic enforcer sa naturang lugar nang hulihin ang suspect sa isang paglabag habang minamaneho nito ang Glaiza Taxi na may plakang PVE-863.

Sa halip na tumigil ay sinagasaan nito ang biktima hanggang sa napailalim sa sasakyan. Mabilis namang isinugod ang biktima sa pagamutan na ngayon ay nasa kritikal itong kondisyon.

Samantala, nagtangka pang tumakas ang suspect subalit inabutan din siya ng mga humabol na kasamahan ng biktima. (Ulat ni Lordeth Bonilla)