Patay na nang idating sa Jose Reyes Medical Center ang biktimang si Alexander Tumamao, 50, dating miyembro ng Phil. Army at residente ng 564 Danganan St., Gagalangin, Tondo.
Ang biktima ay nagtamo ng hematoma sa dibdib sanhi ng malakas na suntok ng anak nitong si Dennis, binata, ng Tondo.
Lumalabas sa inisyal na imbestigasyon ng Western Police District (WPD) Homicide Division dakong alas-2 ng madaling-araw ng maganap ang insidente sa loob ng bahay ng mag-anak.
Nabatid na lasing na lasing na dumating sa bahay ang biktima at pilit na humihingi ng pera sa asawang si Avancia subalit kulang ang ibinigay ng huli dahilan upang magalit ang una.
Nabatid na binugbog ng biktima ang kanyang asawa hanggang sa dumating ang anak nilang si Dennis na umawat dito.
Sa halip na pumayapa ang ama ay pinagdiskitahan nito ang anak na kanya ring pinagsusuntok dahilan upang gumanti ng suntok si Dennis.
Maaaring napuruhan nito sa dibdib ng malakas na suntok ang ama na naging dahilan ng kamatayan nito.
Kasalukuyang nakapiit sa WPD detention cell ang suspect na nakatakdang sampahan ng kasong parricide. (Ulat ni Gemma Amargo)