Kinilala ng Pasig City Police ang biktima na si Elisa Pingkihan, ng MRB Village, Taguig, Metro Manila. Ito ay agad na binawian nang buhay matapos masapol ng tama ng punglo sa ulo.
Base sa imbestigasyon, naganap ang insidente dakong alas-8 ng gabi kamakalawa habang ang biktima ay lulan ng kanilang sasakyan na nakalinya sa south bound lane sa kahabaan ng Amang Rodriguez Avenue sa Brgy. Ugong, ng nasabing lungsod.
Ayon sa testimonya ni Joseph Pingkihan, 38, na nakadestino sa Defense Intelligence Security Group sa Camp Aguinaldo at mister ng nasawi, kasalukuyan umano niyang minaneho ang kanilang sasakyan na isang Mitsubishi Lancer katabi ang kanyang misis nang businahan sila ng suspect na lulan naman sa isang kulay itim na Honda Civic na walang plaka.
Galit na galit na pinagmumura umano sila ng suspect dahil sa masyado umano siyang mabagal magmaneho matapos silang maipit sa sobrang traffic. Bigla din umanong nagbunot ng baril ang suspect at pinaputukan ang kanilang sasakyan na tumama sa kanyang misis.
Matapos ang pamamaril ay mabilis na sumibad nang pagtakas ang suspect. Patuloy naman ang isinasagawang imbestigasyon ukol dito. (Ulat ni Joy Cantos)