Isang team ng NBI kasama ang mga lokal na awtoridad ang nakarekober sa sasakyan ng biktimang si Vincent Fulgar matapos abandonahin sa panulukan ng Waling-Waling St., Modesta Village, San Mateo, dakong alas-3:15 ng hapon nitong Linggo.
Ang nasabing Pajero, may plakang VIP-333 ay natukoy na pag-aari ng biktima sa isinagawang follow-up operations ng mga awtoridad.
Ayon sa mga imbestigador, tadtad ng mga marka ng dugo ang loob ng sasakyan kung saan ay nagsagawa na rin sila ng eksaminasyon sa fingerprints na naiwan ng mga salarin.
Bago umano naganap ang pagpaslang kay Fulgar at pag-abandona rito sa isang bakanteng lote sa Marikina City ay nakatanggap na ito ng mga pagbabanta sa kanyang buhay.
Ang duguang bangkay ni Fulgar, 51, ng Chastity Villas, Busilak, Mandaluyong City ay natagpuan nitong nakalipas na Sabado ng ilang bystanders sa isang bakanteng lote may 20 metro ang layo sa pangunahing kalsada ng Daang Kalabaw, Sitio Payong, Tumana, Brgy. Concepcion Uno, Marikina City.
Ang biktima ay nagtamo ng malalim na pukpok sa noo at batok na posibleng nakuha nito sa paghampas ng matigas na bagay ng mga salarin.
Si Fulgar ay huling nakitang buhay dakong alas-2 ng madaling-araw noong Sabado. (Ulat ni Joy Cantos)