Ito ang binitiwang salita ng isang obsessed fan ng TV host/actress Vanessa del Bianco na inireklamo ng huli ng sexual harrasment kahapon ng hapon.
Kasama ni del Bianco nang magtungo sa himpilan ng pulisya sa Quezon City ang kasamahan niyang host sa Magandang Tanghali Bayan (MTB) na si John Estrada at doon inireklamo si Woody Bisagas, 26, ng Don Antonio Heights, Quezon City.
Batay sa pahayag ni del Bianco, naganap ang insidente dakong ala-1 ng hapon sa loob mismo ng ABS-CBN studio sa mismong programa ng MTB.
Nabatid na isa si Bisagas sa contestant sa isang palaro sa programa ngunit isa rin ito sa natalo. Habang nanonood na lamang ang suspect ay bigla itong tumayo at lumapit kay del Bianco. Hindi ito nakapagpigil at hinatak ang katawan ng TV host, nilamutak ang dibdib at saka siniil ng halik sa labi.
Sa panayam sa suspect, sinabi nitong matagal na siyang tagahanga ni del Bianco at ang pagsali niya sa palaro sa programa ay isang daan upang mapalapit siya sa aktres.
Sa loob ng kulungan ay nag-iiyak pa ang suspect at iginigiit nito na mahal na mahal niya si del Bianco.
Inaalam pa ng pulisya kung lulong sa droga si Bisagas o kung ito ay obsess fan ng aktres.
Pilit namang kinukuha ang pahayag ni del Bianco at Estrada subalit mabilis itong umalis sa himpilan ng pulisya lulan ng isang Mercedes Benz.(Ulat ni Jhay Mejias)