2 maid natangayan ng P 1-M sa 'dugo-dugo' gang

Tinatayang mahigit sa P1 milyong halaga ng pera’t alahas ang natangay ng miyembro ng "dugu-dugo gang" sa dalawang katulong kamakalawa sa Quezon City.

Batay sa ulat, naganap ang insidente dakong ala-1 ng hapon sa tahanan ni Lily Chuangco, negosyante ng #44 Sualo St., Green Meadows Subd., amo ng mga nabiktimang sina Ana Zafra at Arsenia Tambiga.

Sa imbestigasyon, nakatanggap ng tawag sa telepono ang dalawang katulong habang wala ang amo at nagpakilala ang "caller" na kaibigan ni Chuangco. Sinabi ng caller na nakabangga at nabundol umano si Chuangco at kasalukuyang ginagamot sa isang ospital sa Caloocan City.

Dahil sa pangamba ng dalawang katulong sa maaaring mangyari sa kanilang amo, sinunod nila ang iniutos ng "caller" na kunin ang pera at alahas na nakalagay sa kaha-de-yero na nasa master’s bedroom. Iniutos na ihatid ang nakuhang salapi’t alahas sa Manila Central University Hospital kung saan isinugod ang kanilang amo at ang mga nabangga nito. Dito rin magaganap ang aregluhan dahil nakabangga rin ang kanilang amo.

Nang dumating ang amo ng dalawa ay laking gulat nito nang malamang wala na ang kanyang $900, HK$6,000 at mga mamahaling alahas sa kaha-de-yero. (Ulat ni Jhay Mejias)