Dumulog sa himpilan ng pulisya kamakalawa ng gabi ang nakatakas na kidnap victim na nakilalang si Inving Pacheco, grade 4 pupil sa Pasig Catholic School na nasa Barangay Malinao ng nabanggit na lungsod kasama ang kanyang ina na si Vidal, 45, negosyante para iulat ang pangyayari.
Ayon sa ulat, naganap ang pagdukot sa bata dakong alas-2:30 ng hapon kamakalawa habang ito ay nakatayo sa harap ng kanyang paaralan at hinihintay ang kanyang sundo nang biglang hintuan ng isang puting van lulan ang tatlong lalaki pawang nakasuot ng kulay itim na bonnet.
Puwersahang isinakay sa van ang bata.
Binanggit pa ng bata na isang bodega ang pinagdalhan sa kanya na malapit lamang sa lugar na pinagkunan sa kanya.
Isinalaysay pa nito na nagawa niyang makatakas nang makatulog umano ang isa sa mga suspect na nagbabantay sa kanya.
Winasak umano niya ang salamin ng isa mga bintana at saka gumapang papalabas. Isang tricycle driver umano ang kanyang pinara at nagpahatid siya sa kanyang paaralan at doon na niya nakita ang driver ng kanilang pamilya na nag-uwi sa kanya.
Naglunsad naman ng manhunt operation ang pulisya laban sa mga suspect. (Ulat ni Danilo Garcia)