Sinabi ni Macalla na bukod sa pagsasagawa ng inspeksyon sa mga menu na inihahanda para sa mga bilanggo, ang nasabing komite ay inatasan na rin na bantayan ang mga pagkaing dinadala sa NBP upang matiyak na ang mga pagkain ay hindi pinapalitan ng mga katulad na produkto ngunit sa mas mababang kalidad.
Ayon pa kay Macalla, nakatanggap siya ng impormasyon na mayroong ilang supplier ng pagkain na sadyang pinapalitan ng mas mababang kalidad ang mga dinadala nito sa NBP upang makatipid hindi tulad ng mga produkto nito na iniharap sa kanilang bidding committee.
Nabatid na ang naturang Food Monitoring Committee ay pinamunuan ni Fr. Robert Olaguer at binubuo ng ilang representative mula sa iba’t-ibang non-government organizations at mga representante ng mga mismong inmate sa NBP.
Idinagdag pa ni Macalla na binuo ang nabanggit na komite matapos na mapaulat na mahigit 100 bilanggo mula sa Medium Security Compound ng NBP ang napaulat na nalason mula sa isdang kinain nito noong gabi ng Agosto 16. (Ulat ni Grace Amargo)