Honasan at Lacson suportado ng PMA Class '71

FORT DEL PILAR, Baguio City – Susuportahan ng mga nagsipagtapos sa Philippine Military Academy (PMA) Class ’71 ang pagtakbo sa Senado ng kanilang mga mistah na sina dating Philippine National Police Chief Director General Panfilo Lacson at ng re-electionist na si Senador Gregorio Honasan.

Ito ang nabatid kay Chief Supt. Virtus Gil, Class President ng PMA Class ’71 sa pagdalo nito sa PMA Alumni Homecoming.

Ayon kay Gil, maliban kay Honasan at Lacson ay susuportahan rin nila si dating Bulacan Governor Roberto Pagdanganan na adopted ng kanilang klase. "Ang Class ’71 pa, solid kami sa likod nila", pahayag ni Gil, kasalukuyang hepe ng PNP Crime Laboratory Services.

Sina Lacson at Honasan, pawang mga followers ni dating Pangulong Joseph Estrada ay regular na kasapi ng PMA Class ’71 samantalang si Pagdanganan ay honorary member.

Sina Lacson at Pagdanganan ay tumatakbong kandidato sa pagka-Senador sa magkaibang partido pulitikal-Laban ng Demokratikong Pilipino (LDP) at Edsa Force na siyang nagpatalsik kay Estrada sa posisyon. Si Honasan naman ay tumakbong Independent. (Ulat ni Joy Cantos)