15 Angol sa nalimbuwad nga V-hire

CEBU, Philippines — Usa ka van-for-hire nga nagsakay og 15 ka pasahero ang nalimbuwad sa Transcentral Highway, Barangay Cansomoroy, lungsod sa Balamban, Cebu, alas 8:30 sa buntag, Nobyembre 15, 2026.
Lakip sa mga pasahero ang usa ka 57-anyos nga Chinese national nga gikataho nga nawad-an og panimuot human sa aksidente.
Base sa imbestigasyon sa kapulisan, nagbiyahe paingon sa Balamban Proper ang puti nga van nga gimaneho ni Dionisio Menoras Sipada, 51, sa dihang nikagar ang brakes niini sa lugsungong bahin sa dalan.
Tungod niini, nawad-an og kontrol ang drayber hangtod nga nalimbuwad ang sakyanan uban ang 15 ka pasahero.
Giila ang mga pasahero nga sila si Ying Liangrui, 57 anyos, Chinese national; Maina Morante, 53; Fritz Paul Noya Bautista, 43; Eva Quirante Arcala, 38; Renaly Bacalso Alegada, 40; Rozaldo Hayag Taborada Jr., 37; Marlowe Madula Maravillon, 48; James Sebial, 19; Chatty Prado, 34; Clint Romero, 37; Rolen James Tagama Mercado, 31; Irene N. Cablao, 46; Neve Gumaod, 50; Justin Gumaod, 12; ug Teddy E. Alemia, 38.
Duna say duha ka motorsiklo nga napagan sa maong aksidente nga gimaneho ni Elmer Gamido Castillo Jr., 24, ug ni Jimmy Cendino Lucaylucay.
Ang drayber ug mga pasahero sa van, lakip ang Chinese national, nakaangkon og nagkalainlaing samad sa lawas ug gidala sa Cebu Provincial Hospital-Balamban alang sa medikal nga pagtambal.— IBM BANAT NEWS
- Latest




















