P2.9 milyon nga alahas sa Vice Mayor gikawat
CEBU, Philippines — Gipangita sa kapolisan ang kanhing yaya sa anak ni Dumanjug Vice Mayor Wado Gica human mawala ang P2.9 milyones nga kuwarta ug mga alahas sa balay sa pamilya sa Barangay Tisa, Dakbayan sa Sugbo, niadtong Oktubre 10, 2026. Ang gipangita mao si Renjelme Pangan Talan, 29, taga-Batuan, Bohol, nga nailhan usab sa alyas nga “Rheign.”
Base sa impormasyon, nadiskubrehan sa asawa sa bise mayor pasado alas 7:55 sa gabii nga wala na si Talan sa ilang balay.
Namatikdan usab ang pagkawala sa kuwarta, relo ug mga alahas nga gibanabanang mokabat og P2.9 milyones ang kantidad.
Nagsugod og trabaho si Talan sa pamilya isip yaya sa anak ni Gica sukad Agosto 23, 2026.
Wala didto ang bise mayor sa dihang nadiskobrehan ang insidente kay mitambong siya sa kalihokan sa Philippine Councilors League (PCL) sa Clark, Pampanga.
Sa usa ka post sa opisyal nga Facebook page ni Ramil Villena Ayuman, kanhing broadcaster, gipahibalo ang paghatag ni Gica og P50,000 nga ganti sa makahatag og impormasyon nga makatabang sa pagpangita ug pagdakop kang Talan. Gikataho nga migasto ang suspek og mga P500,000 alang sa pagpapa-retoke ug nagpagama usab og bag-ong National ID.
Gipasidan-an usab ang publiko nga gikonsiderar siyang armado ug delikado tungod sa report nga aduna siyay armas.
Gi-report na sa pamilya ang insidente ngadto sa kapolisan ug posible mag-atubang si Talan og kasong qualified theft kalabot sa pagkawala sa kuwarta ug mga alahas.— IBM BANAT NEWS
- Latest
