25,000 used M4 gikan US, para sa AFP reservists

CEBU, Philippines — Gipasalig sa Armed Forces of the Philippines (AFP) ang padayung suporta aron palig-unon ang reserve force atol sa Regional Reservists Convention for Central Visayas nga gipahigayon kagahapon, Sabado, Septembre 11, 2026.

Ang pinasidunggang dinapit sa kalihokan mao si Air Force Major General Gerold N. Gagan Deputy Chief of Staff for Reserve Force Development, J9, nga nipahibalo kun unsa kadako ang paningkamot sa AFP aron mahimong deployable panahon sa emerhensiya ug kalamidad ang mga reservists.

Nitambong sa maong convention ang kapin 200 reservists sa Sugbu ug kapin 200 sab gikan sa nagkalain-laing probinsya ug rehiyon nga gilangkoban og mga reservists sa AFP major services — Army, Navy, ug Air Force.

Gipasiugdahan kini sa Visayas Command pinaagi sa Assistant Chief of Unified Command Staff for Reservist and Retiree Affairs, U9, Col. Ali A. Alejo.

Atol sa convention, gidiskusyonan ang gipangusgang kampanya sa AFP batok sa fake news ug misinformation bahin sa West Philippine Sea, ug ang mga gipangbuhat sa China nga tabunan ang mga paningkamot sa Pilipinas nga dili mailog ang maong teritoryo.

Gituki sab ang mga bag-ong programa ug polisiya para sa reservist development, pag- update sa training doctrines ug capability build-up, apil ana ang bag-ong annual active duty training (AADT).

Ang pinaka-highlight sa diskusyon mao ang planong pagpalit og 25,000 used M4 rifles gikan sa Amerika pinaagi sa Excess Defense Articles (EDA) program para i-isyu sa mga reservists.

“Just imagine if our EDA pushes through—having 25,000 units that we can issue to our reservists if needed. That would be a massive force,” matud pang Gagan.

“Hindi po kayo nag-iisa sa misyong ito. Let us ensure that the reservists remain a credible and dependable pillar of our national defense," dugang Gagan.

Matud pa ni Gagan, ang mandato sa regular force sa AFP mao ang pagpugong nga dili makasulod sa Pilipinas ang mga kaaway, pero ang reserve forces kinahanglang andam panalipdan ang nasud.

Dugang pa ni Gagan, gitun-an karon sa AFP ang mobilization models sa ubang nasud sama sa South Korea ug Israel nga nabantog sa kapaspas nilang mobilisar kun dunay emerhensiya.

Matud niya, gilihok na karon sa Department of National Defense ang pag-establisar og mobilization centers tibuok nasud. — IBM (BANAT NEWS)