SFI nangandam na alang sa Sinulog 2027

CEBU, Philippines — Tulo ka buwan sa dili pa ang Sinulog Grand Parade 2027 nangandam na ang Sinulog Foundation Inc. (SFI) ug ang kagamhanan sa Dakbayan sa Sugbo aron masiguro nga hapsay ug malamposon ang pagsaulog sa dakong kasaulogan sa Sugbo.

Matud ni Elmer "Jojo" Labella, executive director sa SFI nga sayo nga nagtigom ang Executive Committee ug ang Advisory Board aron mahan-ay ang tanang probisyon ilabi na ang kabahin sa marketing ug pundo nga gikinahanglan sa Sinulog 2027.

Giklaro ni Labella nga dili tinuod ang taho nga adunay bag-ong venue sa Sinulog Grand Parade tungod kay subay sa mando ni Mayor Nestor Archival nga magpabilin gihapon kini sa Cebu City Sports Center (CCSC).

Bisan pa sa mga kabalaka bahin sa kahimtang sa rubberized track oval sa CCSC gipadayag nga giplanohan kining ipaubos sa rehabilitasyon apan wala pa masayri ang tukmang panahon sa pagpahigayon niini.

Giklaro usab ni Labell nga ang mga kalihokan sa Sinulog dili makadaot sa oval tungod kay tabonan kini og mga plywood samtang ang mga float adto moagi sa concrete o sementadong agianan. Ang rota sa parada pareho gihapon sa niaging tuig apan gitudlo nga posibleng patas-an og gamay ang agianan paingon sa CCMC ug ACT aron magsilbing "buffer zone" ug malikayan ang paghuot sa trapiko ug contingent.

Sa laing bahin, gibutyag ni Labella nga ang marketing ang labing kritikal nga bahin karong panahona tungod sa pagtaas sa mga gastohan o operating expenses dala sa krisis sa ekonomiya.

Sa pasiunang panagtigom, gihisgotan usab nga walay pagsaka sa ganti ug tabang pinansiyal alang sa contingents tungod kay ang pundo niini nagagikan sa kagamhanan.

Sa pagkakaron, nangandam na ang SFI sa pagsugod og dawat og contingents niining buwana ug ang deadline sa pagrehistro gikatakda sa Nobiyembre 30 o Disyembre 1, 2026.

Ang tanang contingents sa niapil sa bag-ohay lang nga kalihokan sa Kapitolyo ang awtomatiko nga makaapil sa Sinulog Grand Parade subay sa pamahayag ni Gobernador Pamela Baricuatro.

Gilaoman nga adunay mga contingent gikan sa gawas sa Sugbo ug nagpabilin ang mga negosasyon tali sa ilang mga lokal nga kagamhanan.

Kabahin sa foreign contingents, adunay gitan-aw nga interest gikan sa Korean group ug Filipino community sa Estados Unidos apan gitun-an pa kini tungod sa kadako sa gipangayong pundo sa plete ug akomodasyon.

Samtang, gipahibalo usab ni Labella nga usa ka bag-ong kalihokan nga ipahigayon diha sa Fort San Pedro sa adlaw mismo sa Sinulog pinaagi sa pakigtambayayong sa Cultural and Historical Affairs Office (CHAO) pinaagi ni Atty. Bryner Diaz.

Ang maong kalihokan mao ang On-The-Sport Painting diin gihikay pa ang mechanics ug pila ang ganti nga ipanghatag. — /BDB (BANAT NEWS)