BC Cheetahs gisaytan ang ikaupat nga daog

CEBU, Philippines — Ang Benedicto College (BC) Cheetahs mosuway pag-inat sa way pilde nilang ratsada sa dihang ilang sangkaon ang University of Southern Philippines Foundation (USPF) Panthers sa pagbalik sa aksiyon sa Cebu Schools Athletic Foundation, Inc. (CESAFI) Season 24 basketball tournament karong adlawa (Martes, Nobiyembre 5) diha sa Cebu Coliseum.

Ubos sa paggiya ni coach BJ Murillo, ang Cheetahs misirit ngadto sa labing nindot nilang 3-0 nga sinugdanan sukad sila miapil sa liga sa miaging tuig.

Nagtukmod kini kanila ngadto sa ikatulong dapit sa college division standings sunod sa 5-0 nga University of Cebu (UC) Webmasters ug 5-1 nga University of the Visayas (UV) Green Lancers.

Laraw sa Cheetahs nga mokulit sa ikaupat nilang sagunson nga daog sa ilang pakigharong sa Panthers sa alas 6:45 sa gabii.

Ang Panthers sa kasamtangan nagsawo sa ikalima ug ikaunom nga puwesto uban sa Cebu Institute of Technology-University (CIT-U) Wildcats bitbit ang managsamang 2-3 win-loss records.

Sa high school category, ang CIT-U Baby Wildcats nanghinaut nga pahayagan ang medyo hanap nilang tsansa nga makasud sa Final Four sa dihang mosakbang sila batok sa BC Baby Cheetahs sa alas 5:15 sa hapon.

Ang Baby Wildcats nagkupot og 4-3 nga baraha sama sa Baby Panthers, samtang ang Baby Cheetahs tagak na uban ang usa pa lamang ka daog sa walo ka duwa.