Ginebra giusban ang TNT, serye tabla na 2-2

CEBU, Philippines — Giusban og parot sa Barangay Ginebra Kings ang TNT Tropang Giga pinaagi sa 106-92 nga demolisyon sa Game 4 sa ilang best-of-seven PBA Governors' Cup finals niadtong Domingo sa gabii, Nobiyembre 3, didto sa Smart Araneta Coliseum sa Quezon City.  Ang mangtas nga import sa Ginebra nga si Justin Brownlee mikuha og atensiyon sa dihang gitabla sa Gin Kings ang serye sa baraha nga 2-2.

Si Brownlee milansang og duha ka 4-pointers ug tulo ka tres sa gipaulbo niyang 34 puntos hinungdan nga giputol sa Ginebra ang serye ngadto na lang sa best-of-three.

Buk-on sa duha ka karibal ang ilang panagtabla sa Game 5 karong Miyerkules, Nobiembre 6, didto gihapon sa Big Dome.

Mihimo sab og kasikas sila si Stephen Holt, Maverick Ahanmisi ug Japeth Aguilar nga mikadlit og 18 puntos matag usa alang sa Gin Kings.

Ang 4-pointer ni Ahanmisi maoy naggarantiya sa kadaogan sa Ginebra uban ang 101-90 nga labaw sa hilimatyong segundos.

Si Scottie Thompson maoy ikalimang Ginebra player nga miposte og double-digit bitbit ang 12 puntos alang sa Kings nga nakaabot og 100 puntos sa unang higayon ning serye.

Sila si Brownlee, Thompson ug Ahanmisi nagkumbinar og 39 puntos aron ituboy ang Kings ngadto sa 54-42 nga labaw sa halftime.

Kontrolado na kaayo nila ang dagan sa duwa sukad niadto. Ang TNT nahagba sa ikaduhang sunod-sunod nga higayon bisan pa man og sila si Rondae Hollis-Jefferson ug Calvin Oftana nagkumboya'g 54 puntos.