Dili ko mahadlok mamatay

Misaad si Monica nga ugma iya nang sugton si Nicanor. Si Nicanor usa ka manananggot ug mao gyud kini iyang panginabuhi. Sa iyang pagka manananggot nakapa-eskuyla siya sa iyang manghod nga dalaga nga si Lorna. Tulo ra silang managsuon. Dunay karibal si Kanor o Nicanor, nga anak sa kapitan dinhi sa ilang baryo—si Guardo. Bagis ug bugoy kini si Guardo ug dunay daghang barkada nga mga badlongon usab.

“Nahigugma ko nimo, Monica,” ni Nicanor ngadto sa dalaga. “Hala,  uy, ako gyud. Dili pa man ko moapil ana, Kanor. Nag-eskuyla pa man ko,” may pahiyom sa mga ngabil ni Monica.

“Okey lang, makapaabot man ko ba, Monica,” hinay’ng pulong ni Kanor. “Pero, kun wala kay gusto nako, ug kun wala gyud koy paglaom, okey lang gihapon...”

“Duna man kay paglaom, Kanor, kay buotan man ka. Imo ganing gipaeskuyla si Lorna ug si Kiboy, busa angay kang higugmaon kay buotan ka...”pahayag ni Monica. Apan dihang nakalakaw na si Kanor nga nagpas-an sa iyang kawit nga puno sa bag-ong dawat nga tuba, kalit nangabot sila si Guardo. Nakita ni Kanor nga gikuptan ni Guardo ang bukton ni Monica ug gihagkan. Misinggit si Monica ug tungod niini nidagan si Kanor  paingon sa nahimutangan nilang Guardo ug gitigbas niya sila sa iyang sanggot. Nanagan sila ug pulos  dunay samad.

 Ug sukad niadto, ingon sa wala na magbinugoy si Guardo, nagtinarong na kini’g eskuyla. Samtang si Kanor nakurat sa kalit nga pagtumaw ni Monica diha sa iyang payag nga pundohanan niya’g bag-ong dinawat nga tuba. “Mo-Monica, nia lagi ka,” mora’g gikulbaan si Kanor. Karon, karong adlawa maoy gisaad ni Monica nga sugton siya niini. Unsa kahay tuyo ni Monica kaniya, sa balay lang unta, nganong mianhi man kini sa iyang payag.

“Kanor, gidawat na nako ang imong gugma, ayaw baya pagsabasaba, ha,” ni Monica nga paraygon kaayo. Ug ingon sa milupad ang diwa ni Nicanor kay gidawat ni Monica ang iyang gugma, si Monica alang kang Kanor sama sa bag-ong dawat niyang tuba karong buntaga nga lami kaayong imnon. (Kataposan)