Panagtagbo sa biniyaang kasingkasing

Walay wala nahibawo nga siya gibuwagan ni Elizabeth. Tulo ka tuig na ang ilang relasyon, ug wala damha nga milubad ang pagbati sa dalaga ngadto sa ulitawo. Ug tungod niini bisa’g lalaki si Celso nakahilak gyud siya kay dili man gyod niya madawat nga siya gilangkat na sa kasingkasing sa dalaga. Tungod usab niini nakahukom siyang mobiya sa ilang balangay.

“Ayaw na lang god og biya dinhi sa ato, Cel,” ni Clarita nga mora’g gibatig kaguol kun wala na unya si Celso dinhi sa ilang sityo.

“Mobiya gyud ko dinhi sa ato, uy, Clar, kay dili ko makaagwanta nga makita nako si Elizabeth nga duna nay laing hinigugma nga iyang gipuli nako,” kahilakon ang ulitawo.

“Ako bitaw, gibuwagan man kong Ricoy, kay iya kong giilisan og lain, pero, wala koy mahimo, okey lang. Ayaw na lang god og biya dinhi sa ato, Celso. Total may nagmahal pa man nimo dinhi...” ni Clarita nga misugnod og ugang bukong sa iyang giluto nga bibingka.

“May nagmahal nako, kinsa man kuno na, Clar?”, mitutok si Celso kang Clarita, ug karon pa siya, may kaanyag man diay pod kini si Clarita kay taluytoy ang ilong, puti ang pamanit, bus-ok ang lawas ug hingatawa nga ingon sa dili gustong mohambin og problema.

“Ang tigluto nimo’g bingka, he, he, he, joke lang ha. Bitaw,  daghan mang mga dalaga dinhi sa ato ba, Celso...” ug mipahiyom si Clarita.

“Karon pa ko, Clar, guwapa man diay ka ug lami pa gyod kaayo moluto’g bingka,” seryoso ang gilitok ni Celso. Unya iyang gikuptan ang bukton ni Clarita  ug gipislitpislit, ug wala kini badlonga sa dalaga, hinunoa, misamot kini pagpahiyom nga mora’g giganahan.

“Hala, uy, imo mang gipislit ang akong bukton, Cels, kana nalang bag-ong luto kong bingka maoy pislita kay init-init pa,” niini pa nga mapahiyomon uyamot nga ingon sa giganahan sa pagkupot sa ulitawo.

“Bitaw, Clar, nakahukom ko nga dili na mobiya, uy,” ug gikaon ni Celso ang init-init pang bibingka nga bag-ong gihaon ni Clarita. (Kataposan)