Kon mohilak ka, maguol ako

Nakita na  usab ni Felixberto si Nenita nga naglingkod sa may pantawan sa balay sa iyang iyaan nga si Nang Claudia. Ug matataw sa bayhon niini nga naghilak kini. Wala nay mga ginikanan si Nenita ug gihimong katabang sa iyang iyaan.

“Nenita, nia, o gidad-an tika’g poto kay kaganina ko ra ikaw’ng nakita dinhi nga naglingkod. Alas dos na,  ug wala ka pa tingali kapaniudto. Timotimo lang una ining poto nga malagkit,” ni Felix pa ngadto sa dalaga.

“Salamat, ha, Lix, gisagpa na pod kong tiya Claudia,” ni Nenita pa ngadtong Felix.

“Ha, gisagpa ka, unsa may imong sala nga gidapatan ka na man sab, ha?” miiknat ang kilay sa ulitawo nga nabalaka sa sitwasyon karon ni Nenita. Ambot kon ngano nga bation man gyud siya’g kaguol basta makita niyang magmagul-anon si Nenita.

“Nasuko si tiya Claudia dihang ako siyang gisultihan sa gibuhat ni tiyo Magno nako...” dihay mga luha sa mga mata sa dalaga.

“Gikuptan ni tiyo Magno ang akong bukton ug buot ko niyang isulod sa ilang kuwarto ni tiya Claudia. Wala pa man moabot si tiya kagahapon sa hapon. Ug maayo lang gani kay nakalugnot ko ug nakadagan ko paingon sa silong. Duna siya’y dautang tinguha sa akong pagka babaye, Lix, hu, hu, hu. hu...”

“Hayop nga tawo kana si Magno, Nenita. Ikaduha na man gud nang bana sa imong tiya Claudia. Salbahis gyud kanang tawhana. Unsa man, mokuyog ka nako. Ilikay tika gikan sa tawo nga buot manamastamas sa imong kaputli,” seryoso ang tingog ni Felix. Duha na ka buwan kapin nga sila duna nay relasyon ug sa tan-aw ni Felix duna say dakong gugma si Nenita kaniya.

“Oo, Felixberto, mokuyog ko nimo, ilayo ako dinhi ning impiyerno nga dapit samtang wala pa ko masugba sa kaalaotan,” ni Nenita nga nagpatulo sa iyang mga luha. Tuod, nianang  pagkaugma namiya dayon sila sa ilang dapit ug nangadto’g dapit nga lisod na tultolon ni Claudina ug Magno. Karon, malipayon na silang duha kauban sa ilang duha ka anak nga babaye ug lalaki. (Kataposan)